‘थापाको गृहनगर राप्रपाको निशानामा’ एक रुपियाँ भ्रष्टाचार गरे झुण्डिन तयार

0
423

निशा गुरुङ

हेटौंडा–महाधिवेशनमा पराजित भएपछि राप्रपा नेपालको कमाण्ड सम्हालेका कमल थापाको गृहनगर हेटौंडालाई राष्ट्रिय प्रजातन्त्र पार्टीका अध्यक्ष राजेन्द्र लिङ्देनले निशाना बनाएका छन् । चुनाव घोषणापछि उनी भोट माग्न दोस्रो पटक हेटौंडा आएका हुन् ।

केन्द्रीय समितिबाट सम्पूर्ण शक्ति स्थानीय तहको निर्वाचनमा परिचालन गर्ने, सबै स्थानीय तहमा आफ्नै उम्मेद्वार खडा गर्ने निर्णय गराएर लिङ्देन २२ फागुनदेखि देश दौडाहामा निस्किएका हुन् ।

उनले आइतबार आयोजित सभामा आफूले एक रुपियाँ कतै भ्रष्टाचार गरेको प्रमाणित भए झुण्डिन तयार रहेको बताए । ‘देश विकास गर्न कांग्रेस, एमाले र माओवादीले पटकपटक मौका पाए तर देशको भविष्य अन्धकारमात्र बनाए । भोट नोटमा होइन अब सक्षम व्यक्तिलाई बुझेर दिनुपर्छ,’ लिङ्देनले भने । उनले राप्रपाले यसबाट भोट मागेको तर अर्को चुनावमा राप्रपाले मत नमागी जनताले राप्रपाको कामले मत दिने ठोकुवा गरे । ‘अब कति पटक कांग्रेस, माओवादी र एमालेलाई भोट दिएपछि देश बन्छ,’ उनले प्रश्न गरे–एक पटक राप्रपालाई भोट दिनुहोस् । अर्को पटकदेखि हाम्रो कामले भोट माग्नेछ ।

निर्वाचनमा भोट दिनु भनेको उमेर पुगेको छोरीलाई विवाह गरेर दिनुभन्दा पनि ठूलो र सकस भएको बताए । उनले निर्वाचनमा भोट दिनु भनेको उमेर पुगेको छोरीलाई विवाह गरेर दिनुभन्दा पनि ठूलो भएको र जसरी नबुझी विवाह गर्दा छोरीको घर बिग्रनसक्छ, त्यसरी नबुझी र नचिनेर भोट हाल्दा देश बिग्रन्छ भन्ने कुरा उद्घोष गरे ।

उनले कांग्रेसको १४ औ महाधिवेशनमा आफूले राखेको मन्तव्यको स्मरण गर्दै नेपालका ठूला राजनीतिक दलका सुध्रन नसकेको स्पष्ट पारे । उनले देश सुधार्नका लागि राप्रपामात्र होइन, कांग्रेस, एमाले, माओवादी पनि सुध्रनुपर्ने बताए ।

कांग्रेसको महाधिवेशनमा अतिथि वक्ताको रुपमा पुगेका लिङ्देनले ‘संसद् संसद्जस्तो छैन, अदालत अदालतजस्तो छैन, सबै चिजलाई ठेगान लगाउने राजनीतिले हो । राजनीति ठीक छैन । राजनीतिलाई ठीक ठाउँमा ल्याउने नेताले हो, नेताले जनताको विश्वास गुमाएको अवस्था छ, गाउँमा नेता आएछ भन्दैनन् कुन चोर आएछ भन्ने अवस्था छ,’ भनेर मन्तव्य दिएका थिए ।

अध्यक्ष लिङ्देनले भ्रष्टाचार नगरी, कमिसन नखाइ कसरी स्थानीय तहको विकास हुन्छ भनेर हेर्नका लागि यस पटक राप्रपालाई विजयी बनाउन अनुरोध गरे । उनले भने–तपार्इंहरुले यस पटक हेटौंडामा राप्रपालाई जिताउनुभयो भने भ्रष्टाचार नगरी, कमिसन नखाइ विकास भएको देख्नुहुनेछ । यो हाम्रो प्रतिवद्धता भयो । राप्रपाले जितेको स्थानीय तह कस्तो हुँदो रहेछ भनेर हेर्न देशभरका मानिस हेटौंडा आउने बनाउँछांै ।

देशमा कम्युनिष्ट र कांग्रेसले भ्रष्टाचारलाई प्रोत्साहन गरेको भन्दै राप्रपाले भ्रष्टाचार उन्मूलनको महान् उद्धेश्य बोकेको भन्दै उनले थपे–हामीलाई थाहा छ, एमाले, कांग्रेस र माओवादीले प्रोत्साहन गरेको भ्रष्टाचार उन्मूलन सहज छैन । तर, एकदिन राप्रपाले यो काम अवश्य गर्ने छ, म विश्वस्त छु ।

अध्यक्ष लिङ्देनले यस पटकको निर्वाचनमा एमाले–कांग्रेस–माओवादीको बाकस खाली गर्न अनुरोध गरे । वर्षौदेखि सत्ताको स्वाद चाखेका यी दलहरुको बाकस खाली नगरेसम्म नेपालमा भ्रष्टाचार अन्त्य नहुने र देशले विकासको मुल फुटाउन नसक्ने उनले बताए ।

उनले भने–त्यसो गर्न सकियो भने उनीहरुको अघि दुई वटा विकल्प हुन्छ, कि मैदान छाडेर हिँड्नुपर्छ कि त सच्चिनुपर्छ । देश विकासका लागि राप्रपामात्र सच्चिएर नहुने भएकाले यी सबैलाई सुधार गर्नुपर्ने लिङ्देनको भनाइ छ ।

केही छाक टरेको भरमा, केही लिटर पेट्रोल भरेको भरमा ती दललाई मत नहाल्न भन्दै उनले भोट ख्यालख्याल र लहैलहैमा नदिन आग्रह गरे । आफ्नो जीवनकालमा देश बनेको देख्न चाहने एमाले, कांग्रेस र माओवादी कार्यकर्ताले एकपटक राप्रपालाई साथ दिनुपर्ने भन्दै उनले देश सुधार्ने काम राप्रपाले मात्र गर्नसक्ने दाबी गरे ।

‘जनता मालिक हुने भनेको पाँच वर्षमा एक दिन एक क्षण हो,’ लिङ्देनले भने–त्यस बेलामा गर्ने निर्णयले ठूला भनिएकालाई धुलो चटाउन सकिन्छ, राम्रा काम गर्ने मान्छेहरुलाई सत्तामा पु¥याउन सकिन्छ ।

राप्रपा केन्द्रीय उपाध्यक्ष बुद्धिमान तामाङले हेटौंडा उपमहानगरपालिकामा यहाँका नेता र निर्वाचित जनप्रतिनिधिहरुले डोजर र जग्गा प्लटिङको मात्र विकास गरेको टिप्पणी गरे । सभामा उनले आफूले हेटौंडामा स्वास्थ्यको समस्या धेरै समयअघिबाट देखेको तर यहाँका नेता र निर्वाचित जनप्रतिनिधिले समस्या समाधानका लागि पहल गर्न नसकेको आरोप लगाए ।

उनले आफूलाई हेटौंडा अस्पतालमा एमआरआई र सिटीस्क्यानसमेत नहुने जानकारी आएको बताए । उनले वागमती प्रदेशको राजधानी भएर पनि यहाँका जनप्रतिनिधिहरुले अस्पतालको विकास गर्न नसकेको तर आफ्नाको लागि भने डोजर र प्लटिङको विकास गर्नसकेको देखेको बताए ।

उनले हेटौंडाको मेयर उम्मेद्वार दीपकबहादुर सिंह उठाइएको भन्दै सिंहको सक्षम टिमलाई जिताउन अनुरोध गरे । उनले राप्रपाका उम्मेद्वार भ्रष्टाचार र मूल्यवृद्धिविरुद्ध रहेको भन्दै आफ्ना उम्मेद्वारलाई विजयी बनाउन आग्रह गरे ।

तामाङले कालेकाले मिलेर खाउँ भाले भनेजस्तै ठूला दलहरु मिलेर देशलाई खोक्रो बनाएको बताए । ‘भ्रष्टाचारमुक्त, सुशासनयुक्त र समृद्ध देश विकासका लागि स्थानीय तहदेखि केन्द्र सरकारसम्म राप्रपाको नेतृत्व आवश्यक छ,’ उनले भने–हामीले जितका स्थानीय तहमा घरघरमा सरकारको काम पु¥याउनेछौं ।

मेयर उम्मेद्वार सिंहले आफूलाई हेटौंडाको मेयरमा जिताउन अपिल गरे। हुप्रचौरमा भएको चुनावी सभामा सिंहले हेटौंडाबासीले मेयरमा जिताए भ्रष्टाचार अन्त्य गर्ने उद्घोष गरे । उनले हेटौंडाको स्वास्थ्य क्षेत्र निकै कमजोर रहेको र हेटौंडा अस्पताल रिफर सेन्टरका रुपमा रहेको भन्दै आफू मेयर विजयी भए विशेषज्ञ सेवासहित सुबिधायुक्त अस्पताल निर्माण गर्ने बताए । उनले हेटौंडालाई सुन्दर, सभ्य, सफा तथा विकासको दृष्टिले देशकै नमूना सहर बनाउन आफूसँग योजना रहेको बताए । उनले आफू र जनताको गठबन्धन भएको भन्दै यस पटक मेयरमा आफू जित्ने र सरकारी भ्रष्टाचारको गठबन्धन पराजित हुने दाबी गरे ।

कार्यक्रममा तत्कालीन नेकपा एमालेका महासचिव तथा पूर्वप्रधानमन्त्री मनमोहन अधिकारीको नातिनी स्वेता खड्का राप्रपामा प्रवेश गरिन् । उनलाई पार्टी अध्यक्ष लिङ्देनले खादा र टीका लगाएर पार्टीमा स्वागत गरेका थिए । राप्रपाले यस पटक नगर मेयर, उपमेयर र सबै १९ वटा वडामा उम्मेद्वार उठाएको छ । जबकि, राप्रपा नेपालको उम्मेद्वारी मकवानपुरमै शून्य छ ।

LEAVE A REPLY

Please enter your comment!
Please enter your name here