काठमाडौं । विक्रम, ऐश्वर्या राय बच्चन, तृषा र जयम भारी स्टारर प्रतीक्षित फिल्म ‘पीसए-वान’को ट्रेलर सार्वजनिक भएको छ । विस्तृत शीर्षक ‘पोनिया सेल्भन : पार्ट वान’ बताइएको फिल्म असोज १४ गते प्रदर्शन तयारीमा छ । नेपालमा पनि फिल्म रिलिज गर्न केही वितरक जुटेका छन् ।
चेन्नईमा आयोजित भव्य कार्यक्रममा ट्रेलर लन्च गरिएको हो । १० औं शताब्दीमा चोल वंशलाई दक्षिण उपमहाद्वीपमा शक्तिशाली साम्राज्य बनाउन बल पुग्ने घटनालाई फिल्मले पुनः वर्णन गरेको छ ।
ट्रेलरमा कमल हसन र रजनीकान्तले पनि स्वर दिएका छन् । कल्की कृष्णमूर्तिको लोकप्रिय उपन्यासमा आधारित र राजा चोझानको जीवन दर्शाउने यो फिल्मको पटकथा मणिरत्नम, जयमोहन र कुमार रत्नमले लेखेका हुन् ।
पीसए-वान भाग २ को पहिलो श्रृंखलाको फिल्म हुनेछ । आदित्य कारिकलनको भूमिकामा विक्रम, ऐश्वर्या राय बच्चन नन्दिनीको भूमिकामा, कार्ती भन्थियाथेनको भूमिकामा प्रस्तुत भएका छन् ।
ओस्कार विजेता एआर रहमानको संगीत, श्रीकर प्रसादको सम्पादन, रवि बर्मनको छायांकन छ । मद्रास टाकिजको निर्माण रहेको फिल्मले लाइका प्रोडक्सनसँग सहकार्य गरेको छ ।
