हेटौंडा–जिल्ला समन्वय समिति मकवानपुरको निर्वाचन असार २ गते हुने भएको छ । निर्वाचनको कार्यतालिकाअनुसार गठबन्धन दल र नेकपा एमालेका तर्फबाट उम्मेद्वारी दिइएको छ ।
मकवानपुरमा गठबन्धन दलका प्रमुख र उपप्रमुख धेरै भएकाले उनीहरुका उम्मेद्वारले जित्ने निश्चित जस्तै भएको छ । मुख्य निर्वाचन अधिकृतको कार्यालयमा उम्मेद्वारी दर्ता गराइएको छ । गठबन्धन दलका उम्मेद्वार र नेकपा एमालेका उम्मेद्वारले मनोनयन दर्ता गराएका छन् । हाल भइरहेको पदबाट राजीनामा दिएर उम्मेद्वारी दिने धेरै छन् । मुख्य निर्वाचन अधिकृतको कार्यालयमा प्रमुख–उपप्रमुख र ७ सदस्यका लागि १२ जनाले मनोनयन दर्ता गराएका हुन् ।
प्रमुख पदमा सत्तारुढ गठबन्धनका तर्फबाट नेकपा माओवादी केन्द्रका ललितबहादुर घलानले मनोनयन दर्ता गराएका छन् । उनी हालै सम्पन्न स्थानीय निर्वाचनबाट हेटौंडा–१२ को वडा अध्यक्ष निर्वाचित भएका थिए । प्रमुखमा नेकपा एमालेबाट इन्द्रसरोवरका बुद्धिराम डिम्डुङले मनोनयन गराएका छन् । उपप्रमुखमा भने गठबन्धनका तर्फबाट नेपाली कांग्रेसका सानुकाजी लुईंटेलले मनोनयन गराएका छन् । उक्त पदमा उनले मात्र मनोनयन गराएको मुख्य निर्वाचन अधिकृतको कार्यालयले जनाएको छ ।
जिससमा ३ महिला सदस्य रहने प्रावधान रहेकोमा ४ जनाले मनोनयन दर्ता गराएपछि उक्त पदका लागि निर्वाचन हुने भएको छ । महिला सदस्यमा नेपाली कांग्रेसबाट तारा ढुंगाना, विष्णुमाया थपलिया, सुमित्रा थिङ र नेकपा एमालेकी बिनाकुमारी थिङ लामाले उम्मेद्वारी दिएका हुन् ।
दलित तथा अल्पसंख्यक सदस्यतर्फ नेकपा (एकीकृत समाजवादी) बाट सुनिता दर्नाल परियारले मात्र उम्मेद्वारी दर्ता गराएकी छन् । खुला सदस्यहरुमा नेकपा (एकीकृत समाजवादी) बाट वीरेन्द्रकुमार लामा, नेकपा माओवादी केन्द्रका सुवर्ण गोपाली, माओवादीकै खड्गबहादुर पुलामी र एमालेका तोयनाथ तिमल्सिनाले उम्मेद्वारी दिएका हुन् । खुला सदस्य ३ जना हुने व्यवस्था भए पनि ४ जनाको उम्मेद्वारी परेकाले उक्त पदमा पनि निर्वाचन हुने भएको हो ।
मनोनयन दर्ता गराएका उम्मेद्वारमाथि मंगलबार दाबीविरोधको समय रहेको मुख्य निर्वाचन अधिकृत डिल्लीरत्न श्रेष्ठले जानकारी दिए । उनका अनुसार मंगलबार नै मनोनयनपत्रको जाँच र उजुरी परे त्यसउपर निर्णय गरिने, उम्मेद्वारको नामावली प्रकाशन, उम्मेद्वारी फिर्ता लिन चाहे लिन सकिने र नलिएको अवस्थामा अन्तिम नामावली प्रकाशन हुनेछ । असार १ गते उम्मेद्वारलाई निर्वाचन चिह्न प्रदान गरिने र २ गते मतदान हुने कार्यसूची छ ।
मकवानपुरमा हेटौंडा उपमहानगरपालिका, थाहा नगरपलिका र ८ गाउँपालिका छन् । सबै पालिकाको प्रमुख र उपप्रमुख गरी २० जनाले जिससका लागि मतदान गर्न पाउनेछन् । स्थानीय निर्वाचनबाट निर्वाचित जनप्रतिनिधिको संख्या हेर्दा कांग्रेसका ९, माओवादी केन्द्रका ७, नेकपा एमालेका ३ र एकीकृत समाजवादीका १ मतदाता छन् । ९ सदस्यीय जिल्ला समन्वय समितिमा प्रमुख तथा उपप्रमुख र ७ सदस्य रहने प्रावधान छ ।
