काठमाडौं । २०७२ सालमा रिलिज भएको फिल्म ‘रेशम फिलिली’मा समावेश गीत ‘पारी त्यो डाँडा’मा निकै चर्चित भयो । यतिसम्म चर्चित की दर्शकले फिल्मको टाइटलले होइन, गीतले फिल्मलाई चिने ।
कालीप्रसाद बाँसकोटाको संगीतमा बनेको उक्त गीत यतिविधि भाइरल बन्यो कि विदेशमा समेत यसमाथि धेरै टिकटक भिडियो बने । गीतको चर्चाले नै फिल्मको ब्यापारमा मद्दत पुगेको थियो ।
फागुन १४ मा निर्माताले यसको नयाँ संस्करणको रुपमा ‘फेरि रेशम फिलिली’ दर्शकमाझ ल्याउँदैछन् । यो फिल्ममा पनि उक्त सुपरहिट गीतको नयाँ भर्सन ‘फेरि जालमा’ समावेश हुने भएको छ । प्रवर्धनको लागि यो गीत रिलिज गर्ने तयारी छ । यो गीत फिल्मभित्रै समावेश हुनेछ वा प्रवर्धनमा मात्र सीमित हुनेछ, त्यो खुलाइएको छैन ।
‘फेरि जालमा’को भिडियो छायांकन सकिएको छ । निर्माताले शुक्रबार यसका केही रोमान्टिक तस्वीर सार्वजनिक गरेका छन् जसमा शीर्ष कलाकार विनय श्रेष्ठ र सुपुष्पा भट्टलाई देख्न सकिन्छ । गीतको संगीत र गायन समूह पनि पुरानै छन् ।
बासकोटाले संगीत दिएका छन् भने मानस राजले शब्द लेखेका हुन् । बासकोटा र सोमिया बराइलीले स्वर दिएका छन् । प्रदीप लामाले नृत्य निर्देशन गरेका छन् । गीतले फिल्मको प्रवर्धनमा मद्दत गर्ने निर्माताको विश्वास छ ।
